سەرۆکی چین، لە چاوپێکەوتنێکیدا ئاماژەی بەوەکرد هەڵبژاردەیەکی دروست کراوە بۆ پەرەپێدانی پەیوەندییەکانی نێوان پەکین و واشنتۆن.
شی جینپینگ، سەرۆکی چین، لە چاوپێکەوتنێکیدا لەگەڵ ڕۆژنامەی گڵۆباڵ تایمز رایگەیاند، “لە کاتێکدا لە قۆناغێکی مێژووییداین لەگەڵ ئەمریکا، پێکەوە هەڵبژاردەیەکی دروستمان کردووە”.
لە پرسیارێکی ئەو رۆژنامەیەدا سەبارەت بەوەی چین و ئەمریکا وەک رکابەر یان هاوبەش هەژمار بکرێن، سەرۆکی چین وتی: “ئەمە پرسیارێکی بنەڕەتی و هەمەلایەنەیە”.
چوارشەممەی ڕابردوو جۆ بایدن، سەرۆکی ئەمریکا، یەکەمین دیداری ڕووبەڕووی خۆی لەگەڵ شی جینپینگ، سەرۆکی چین لە دوای ساڵێک ئەنجامدا لە میانی بەشداریکردنیان لە کۆبوونەوەی لوتکەی هاوکاری ئابوری ئاسیا و زەریای هێمن لە سانفرانسیسکۆ.
لە میانەی گفتوگۆکانی سەرۆکی چین و ئەمریکا، هەردوولا ڕێککەوتن لەسەر گەڕانەوە بۆ گفتوگۆ لەسەر ئاستێکی یەکسان لە نێوان وەزارەتە سەربازییەکانی هەردوو وڵاتدا، لەوانەش کۆبوونەوەی کارکردنی وەزیرانی بەرگری، ڕاوێژکردن لەسەر پرسەکانی ئاسایشی دەریایی و ئەنجامدانی گفتوگۆی تەلەفۆنی لە ئاستی فەرماندەکانی ناوچەی شەڕدا، بێجگە لەوەش هەردووکیان بڕیاریاندا گفتوگۆیەک لەسەر ئاستی حکومەت بۆ پێشخستنی پڕۆژەکان لە بواری زیرەکی دەستکرد دەستپێبکەن.
