بەڕێوەبەرایەتیی کەشناسیی هەرێم بڵاویکردەوە، لە سبەینێ دووشەممەوە بەفربارین ناوچە شاخاوییە سنوورییەکانی هەرێم دەگرێتەوە.
بەڕێوەبەرایەتیی کەشناسیی و بومەلەرزەزانیی هەرێم بڵاویکردەوە، ئەمڕۆ یەکشەممە ئاسمان نیمچە هەور دەبێت لە کاتەکانی بەیانی و نیوەڕۆ، پاشان لە دواى نیوەڕۆ کاریگەرى شەپۆلێکى بارانبارین لەسەر ناوچەکەمان دەستپێدەکات، سەرەتا بارانبارین مامناوەند دەبێت، پاشان بارانەکە بەهێزتر دەبێت دەگۆڕێت بۆ بارانى بەلێزمە و هەورە تریشقە لە کاتەکانى ئێوارەدا لە سنوورى پارێزگاى هەولێر و سنوورى پارێزگاى دهۆک، لە شەو درەنگدا کاریگەرى ئەم شەپۆلە دەگاتە سنوورى پارێزگاى سلێمانى و ئیدارەى راپەڕین، زۆرترین رێژەى دابارین لەسەر پارێزگاى دهۆک دەبێت بەتایبەتى (شیلادزێ، ئامێدى، جەمانکى، ئاکرێ)، هەروەها زیادبوونى خێراىی با لەسنوورى پارێزگاى هەولێر و سنوورى پارێزگاى کەرکووک لە کاتەکانى دواى نیوەڕۆ.
ئاماژەی بەوەشکرد، ئاسمان بە گشتی هەور و باراناوی دەبێت بە درێژایى کاتەکان، ئاستى دابارین لێزمە بارانى بەردەوام و هەندێک کات مامناوەند دەبێت، لە سەرجەمى ناوچە جیاجیاکان، لەگەڵ بارانبارین شەپۆلێکى بەفربارین ناوچە شاخاوییە سنووریەکان و لووتکەى ناوچە شاخاویییە بەرزەکان دەگرێتەوە، کاریگەرى ئەم شەپۆلە لەکاتەکانى شەو درەنگدا لاواز دەبێت.
