لاوازی ئاستی هێرشبەری یانەی یوڤانتۆس بەرپرسانی یانەکەی ناچارکردووە بیر لە کڕینی هێرشبەرێکی سەرەڕمی گۆڵکار بکەنەوە.
ڕۆژنامەی توتۆ سپۆرتی ئیتاڵی لە ڕاپۆرتێکی شیکاریدا ئاماژەی بە بارودۆخی دارایی یانەکانی ئەوروپا کردووە و دووپاتیکردووەتەوە، هیچ یەکێک لە یانە زەبەلاحەکان ئەو نەختینە زۆرەیان بەدەستەوە نەماوە کە ساڵانە لە میرکاتۆی زستانەدا بەکاریانخستووە، بەم هۆیەوە ناچاربوون لە بازاڕی گواستنەوەی یاریزاناندا بەدوای یاریزانی ئەزموندار و هەرزانبەهادا بگەڕێن.
بەپێی سەرچاوەکە، فابیۆ پاراتیچی و پاڤێل نێدڤد و هاوکارانیان چاویان بڕیوەتە تواناکانی سێ هێرشبەری بەتوانا، کە پێکهاتوون لە مێمفس دیپای (لیۆن)، دیڤۆک ئۆریجی (لیڤەرپوڵ)، دیێگۆ کۆستا (ئەتلەتیکۆ مەدرید)، سەرجەمیان لە هاوینی 2021 بۆندەکانیان کۆتاییدێت و گواستنەوەیان بودجەیەکی کەمی پێویستە.
یەکەمیان لەلایەن یانەی بەرشلۆنەوە داواکراوە و نرخی گواستنەوەی بە پێنج ملیۆن یورۆ خەمڵینراوە، ئۆریجی کە هێرشبەری یەدەگی یانەی لیڤەرپوڵە، هەستدەکات لەلایەن یۆرگن کلۆپەوە پشتگوێخراوە و دەرفەتی یاریکردنی پێنادرێت، بۆیە داوای دەستبەرداربوونی کردووە.
سێیەمیشیان کە دیێگۆ کۆستای ئیسپانییە، حاڵی حازر بۆندەکەی لەگەڵ ئاتلەتی هەڵوەشاندووەتەوە و دەتوانێت بێبەرانبەر پەیوەندی بە خانمە پیرەکەی ئیتاڵیاوە بکات.
