وەزارەتی خوێندنی باڵای هەرێم بڵاویکردەوە، “لە دیدارێکماندا لەگەڵ وەزارەتی تەندروستی کێشە و گرفتەکانی کۆلێژی پزیشکی زانکۆی گەرمیان گفتوگۆی لەبارەوە کرا و کێشەکانیان چارەسەر دەکەین”.
لە راگەیەندراوێکدا وەزارەتی خوێندنی باڵا و توێژینەوەی زانستیی هەرێمی کوردستان رایدەگەیەنێت، “وەفدێکی خوێندنی باڵا بەمەبەستی چارەسەرکردنی کێشە و گرفتەکانی کۆلێژی پزیشکی زانکۆی گەرمیان سەردانی وەزارەتی تەندروستییان کرد”.
ئەوەشی خستۆتەڕوو، “لەدیدارێکدا تیشک خرایە سەر کێشە و گرفتەکانی ئەو کۆلێژە و د.سامان بەرزنجی، وەزیری تەندروستی ئامادەیی خۆی بۆ چارەسەرکردنی گرفتەکان پیشاندا و هەموو ئامادەییەکی وەزارەتەکەی خستەڕوو، بەتایبەت پرسی دابینکردنی ستافی ئەکادیمی و گۆڕینی پۆلێنبەندی نەخۆشخانەکانی گەرمیان بۆ نەخۆشخانەی فێرکاری”.
خوێندنی باڵا دەشڵێت، “وەزیری تەندروستی ئامادەیی نیشاندا بۆ دەستەبەرکردنی ستافی پێویست بۆ کۆلێژەکە لەڕێگەی گواستنەوەیان بۆ سەر میلاکی کۆلێژی پزیشکی و دواتریش تەنسیب کردنەوەیان بۆ سەر وەزارەتی تەندروستی بە ڕەچاوکردنی ڕێوشوێنە زانستی و کارگێڕییەکان”.
بڕیاریشدرا هەردوو وەزارەتەکە پێکەوە هەماهەنگی بکەن بۆ گۆڕینی پۆلێنبەندی نەخۆشخانەکانی گەرمیان بۆ نەخۆشخانەی فێرکاری بەمەبەستی راهێنان و ئەنجامدانی لایەنی پراکتیکی خوێندکارانی کۆلێژی پزیشکی زانکۆی گەرمیان.
