نرخی كیلۆگرامێك گۆشتی سوور بۆ سەرووی 20 هەزار دینار بەرزبووەتەوە و وەزارەتی كشتوكاڵ هۆكارەكەی ئاشكرادەكات.
وەزارەتی كشتوكاڵی عێراق ئەمڕۆ شەممە راگەیەندراوێكی لەبارەی بەرزبوونەوەی نرخی گۆشتی سوورەوە بڵاوكردەوە و رایگەیاند، سێ هۆكار لە پشت بەرزبوونەوەی نرخی گۆشتەوەن.
بەپێی راگەیەندراوەكە، بەرزبوونەوەی بەهای دۆلار بەرامبەر بە دینار، كەمبوونەوەی ئاژەڵ لە بازاڕەكاندا و بەرزبوونەوەی نرخی ئالیك، سێ هۆكاری سەرەكین بۆ بەرزبوونەوەی نرخی گۆشتی سوور.
وەزارەتی كشتوكاڵی عێراق دەڵێت، سەرباری ئەوەی نرخی ئالیك بەرزبووەتەوە، بەشێك لە ئاژەڵدارەكان پێشتر ئالیكیان بە نرخی هەرزان كڕیوە و ئەمباریانكردووە، بۆیە ئێستا دەیانەوێت ئاژەڵەكانیان بەو ئالیكە بەخێوبكەن و تا ماوەیەك ئاژەڵەكانیان بۆ فرۆشتن نەخەنەڕوو، ئەوەش خستنەڕووی ئاژەڵی لە بازاڕدا كەمكردووەتەوە و بووەتەهۆی بەرزبوونەوەی نرخی ئاژەڵ و گۆشتی سوور.
