هەڵمەتی نیشتمانیی سەوزکردنی کوردستان لەسەر بڕیاری بافڵ جەلال تاڵەبانی سەرۆکی یەکێتیی نیشتمانیی کوردستان بەردەوامە و ئەمڕۆش هەڵمەتی نەمام رواندن لە سنووری پڕۆژەی دارستانی خدران سەر بە بەڕێوەبەرایەتیی دارستان و پاوانی سلێمانی بەڕێوەچوو.
لە میانی بەشداریکردنی لە هەڵمەتەکەدا حاکم ساڵح محەمەد، بەڕێوەبەری ناحیەی خدران ئەم هەنگاوەی بە کارێکی پیرۆز و گرنگ وەسفکرد بۆ سەوزکردنی کوردستان و خزمەتکردنی ژینگە و ئاووهەوای ناوچەکە.
هاوکات حسێن حەمەکەریم، نوێنەری نووسینگەی سەرۆک بافڵ جەلال تاڵەبانی رایگەیاند، هەڵمەتی رواندنی یەك ملیۆن نەمام بەشێوەیەکی زۆر باش بەڕێوەچووە و لەئێستاشدا هەوڵەکانمان چڕترکردۆتەوە و سنووری قەزا و ناحیەکانیشی گرتۆتەوە و دەمانەوێت بە هەوڵی هەموولایەک ئەو ئامانجە بەدیبهێنین کە هەڵمەتەکەی لەپێناودا راگەیەنراوە.
وتیشی، “لە پرۆژەی دارستانی خدران، سەرباری رواندنی نەمامەکان و بەرفراوانکردنی رووبەری دارستانەکە، بەپشتبەستن بە پلان و بەرنامەی پێشوەختە کە بەڕێوەبەرایەتیی دارستان و پاوانی سلێمانی جێبەجێی دەکات، توانیمان رێگابکەینەوە و ئامادەکاری بکەین بۆ کاتی ئاودان و خزمەتکردنی ئەو دارستانەی کە ئەمڕۆ نەمامەکانمان تێدا رواند”.
