وتەبێژی بازاری دراوی سلێمانی رایدەگەیەنێت، لە كۆبوونەوەمان لەگەڵ بافڵ جەلال تاڵەبانی، باس لە دامەزراندنی چەند كارگەیەك و وەبەرهێنانی زیاتر لە سلێمانی كران كە هەموو ئەمانە بە جێبەجێكردنیان جموجۆڵی بازرگانی زیاددەكات و هەلی كار دەرەخسێنێت.
ڕۆژی پێنجشەممە، بافڵ جەلال تاڵەبانی سەرۆكی یەكێتیی نیشتمانیی كوردستان لە دەباشان لەگەڵ نوێنەرانی بازاڕی دراوی سلێمانی، زەڕەنگەران، بازاڕی جگەرەكە و بازرگانانی سەربەخۆ كۆبووەوە.
دوای كۆبوونەوەكەش جەبار گۆران وتەبێژی بازاری دراوی سلێمانی لە كۆنگرەیەكی رۆژنامەوانیدا كە پەیامنێری تۆڕی میدیایی ئێستا ئامادەیبوو وتی، ” لە كۆبوونەوەی ئەمڕۆدا دڵنیایی تەواومان وەرگرت كە سەرۆكی یەكێتی بە هەموو شێوەیەك پشتیوانمان دەبێت تا بازرگانان بتوانن وەبەرهێنانی زیاتر لە سلێمانی بكرێت و سێكتەری ئابوری و بواری بازرگانی لە سلێمانی ببوژێندرێتەوە”.
راشیگەیاند، لە كۆبوونەوەكەدا باس لە دامەزراندنی چەند كارگەیەك و وەبەرهێنانی زیاتر لە سلێمانی كران كە هەموو ئەمانەش وادەكات جموجۆڵی بازرگانی زیادبكات و هەلی كار بۆ گەنجان بڕەخسێندرێت و بافڵ جەلال تاڵەبانیش دڵنیایی دا بە هەموو شێوەیەك پشتیوانمان بێت.
