لەسەر ڕێگای دەربەندی ڕانیە ئۆتۆمبێلێکی ئاسایش تووشی ڕووداوی هاتوچۆ بوو و بەهۆیەوە هەشت ئەندامی هێزەکانی ئاسایش برینداربوون.
عەلی عەبدوڵڵا وتەبیژی بەڕێوەبەرایەتیی هاتوچۆی ڕاپەڕین بە تۆڕی میدیایی ئێستای وت، “ئۆتۆمبێلێکی ئاسایش کە زیندانیكراوی گواستووەتەوە لە دەربەندی ڕانیە بەهۆی تیژڕەوییەوە کۆنترۆڵی لەدەستداوە و وەرگەڕاوە”.
دکتۆر فەرمان ئەحمەد لێپرسراوی کارگێڕیی نەخۆشخانەی فێرکاری ڕانیە لەبارەی قوربانییانی ڕووداوەکە بەتۆڕی میدیایی ئێستای ڕاگەیاند، “لە ڕووداوەکەدا هەشت ئەندامی هێزەکانی ئاسایش برینداربوون و گواستراونەتەوە بۆ نەخۆشخانەی فێرکاریی ڕانیە، سەرجەمیان تەندروستییان جێگیرە”.
