بەڕێوەبەرایەتیی کەشناسی بڵاویکردەوە، ئەمڕۆ بەفربارین سەنتەری پارێزگاکانی هەرێمی کوردستان دەگرێتەوە.
بەڕێوەبەرایەتیی کەشناسی و بومەلەرزەزانیی هەرێم لە راگەیەندراوێکدا بڵاویکردەوە، “ئەمڕۆ دووشەممە ئاسمان نیمچە هەور بۆ هەوری تەواو دەگۆڕێت لە کاتەکانی بەیانی شەپۆلێکی دیکەی بەفربارین هەرێمی کوردستان دەگرێتەوە بەجۆرێک لە کاتەکانی بەیانی سەرەتا لە ناوچە سنووریەکانی رۆژئاوای پارێزگای دهۆک دەستپێدەکات پاشان بۆ کاتەکانی دوایی نیوەڕۆ تەواوی ناوچەکان دەگرێتەوە.
ئاماژەی بەوەشکرد، لە زۆربەی ناوچە شاخاوییەکان و سەنتەری پارێزگانی (دهۆک، سلێمانی، هەڵەبجە ) و دەوروبەری سەنتەری پارێزگاکانی ( هەولێر و کەرکوکیش) دەگرێتەوە، لە ناوچە نزمەکانی هەرێم نمەباران دەبارێت پاشان بۆ کاتەکانی شەو کاریگەری لاواز دەبێت.
ئاشکراشیکرد، سبەینێ سێشەممە ئاسمان هەور دەبێت لەگەڵ بارینی بەفر لەناوچە شاخاوییەکان زیاتر لەناوچە سنوورییەکانی رۆژهەڵات پاشان بۆ کاتەکانی نیوەڕۆ کەش سەقامگیر دەبێتەوە.
