ستافی پۆرتوگال شکستەکەیان لە مۆندیالی قەتەر دەخەنە ئەستۆی ناوبژیوانان، جەختیش لەوە دەکەنەوە، کە پیلانگێڕی بۆ ئەرجەنتین دەکرێت تاوەکو جامەکە لەلایەن مێسی-یەوە بەرزبکرێتەوە.
دوای شکستی پۆرتوگال بەرامبەر مەغریب، هەریەک لە برونۆ فێرناندێز و پیپێ جەختیان لەوە کردەوە، کە داوەری یارییەکە ئەرجەنتی بووە و هەموو هەوڵێکی داوە پۆرتوگال بە دۆڕاندن بدات، ئەم هەنگاوەشیان بە ڕێگەخۆشکەر بۆ گەیاندنی ئەرجەنتین بە ناسناوەکە وەسفکردووە.
لە بەرامبەر تیۆری پیلانگێڕیدا، خێزانی کریستیانۆ دژی ڕاهێنەری پۆرتوگال و یاریزانەکان وەستاونەتەوە، هاوشانی 10 یاریزانی دیکە بڕیاریانداوە لەگەڵ پێکهاتەی پۆرتوگال نەگەڕێنەوە بۆ وڵاتەکەیان و لە قەتەر بمێننەوە.
ئیلما ئاڤێرۆی خوشکی کریستیانۆ تەواوی شکستی پۆرتوگال دەخاتە ئەستۆی فێرناندۆ سانتۆسی ڕاهێنەر و تیۆری پیلانگێڕی ڕەتدەکاتەوە.
ئیلما دوای یارییەکە وتوویەتی، “ئەو پیاوەیان کوشت (کریستیانۆ)، هەڵبژاردەی نیشتمانییان کوشت، گەلێکیان کوشت.”
هەروەها جۆرجینا ڕۆدریگێزی دەستگیرانی “دۆن” لە ئینستاگرام نووسیویەتی، “ئەمڕۆ هاوڕێکەت، ڕاهێنەرەکەت خراپترین بڕیاریاندا.”
