ئەو دەرچووانەی زانكۆ و پەیمانگەكان كە كەسوكاریان ئەنفالكراون، لە هەولێر خۆپیشاندانیان كرد، بەڵام لە ئەنجومەنی وەزیران دەركران.
ئەمڕۆ سێشەممە ژمارەیەك لە دەرچووانی كەسوكار ئەنفالكراو، لە بەردەم ئەنجومەنی وەزیرانی هەرێمی كوردستان لە هەولێر گردبوونەوەیان رێكخست و وەك خۆیان دەڵێن، “داوادەکەن دابمەزرێندرێن”.
پەیامنێری تۆڕی میدیایی ئێستا لە هەولێر رایگەیاند، بەشداربووانی خۆپیشاندان و گردبوونەوەكە، پێكهاتوون لە ژمارەیەك کوڕ و کچی ئەنفالکراو كە دەرچووی زانكۆ و پەیمانگەكانی هەرێمی كوردستانن و تا ئێستا دانەمەزرێندراون، لەگەڵ ئەوانیشدا ژمارەیەك لە دایك و كەسوكاریان بەشداریی گردبوونەوەكەیان كردووە.
وتیشی، “خۆپیشاندەران چوونەتە ناو باڵەخانەی ئەنجومەنی وەزیران، بەڵام گوێیان لێنەگیراوە و دەركراون”.
