سەرچاوەیەكی پۆلیس ڕەتیكردەوە ئێوارەی ئەمڕۆ چوارشەممە شەڕەتەقە لە بازگەی بانی مەقان ڕویدابێت.
دوای بڵاوبوونەوەی دەنگۆی دروستبوونی شەڕەتەقە لە بازگەی بانی مەقان لەسەر ڕێگای كەركوك – سلێمانی، سەرچاوەیەك لە بەڕێوبەرایەتیی پۆلیسی چەمچەماڵ لە لێدوانێكی تایبەتدا بۆ “تۆڕی میدیایی ئێستا” هەواڵەكەی ڕەتكردەوە و ڕایگەیاند، “شەڕەتەقە لە بازگەكە ڕوینەداوە.”
بە گوێرەی زانیارییەكان، ئەوەی كە ڕویداوە تەنها تەقاندنی چەند گولەیەك بووە بە ئاسماندا لەلایەن كارمەندانی بازگەكەوە، ئەوەش دوای ئەوەی شەڕ و دەمەقاڵێ لەنێوان شۆفێری چەند ئۆتۆمبیلێكدا ڕویداوە.
پێتشر لە هەندێك سەرچاوە وابڵاوكرایەوە كە “شەڕەتەقە لە بازگەی كەركوك- سلێمانی لە خۆرهەڵاتی شاری كەركوك دروستبووە.” بەڵام ڕائید عامر نوری، وتەبێژی پۆلیسی كەركوك لە لێدوانێكدا بۆ “تۆڕی میدیایی ئێستا” دەنگۆكەی ڕەتكردەوە و جەختیكردەوە لە بازگەی ناوبراو هیچ حاڵەتێكی لەو جۆرە ڕوینەداوە.
