لافاو و زریانی نانمادول لە ژاپۆن ماوەی سێ ڕۆژە زیانی گیانی و ماڵیی زۆری لەو وڵاتە داوە، دەسەڵاتداران دەڵێن، 69 كەس گیانیان لەدەستداوە.
زۆرینەی قوربانییەكان ئاو بردوونی، بەڵام هەندێكیان بەهۆی كەوتنی تەن و كەرەستەوە بەسەریاندا مردوون و یەكێكی دیكەیان لەناو ئۆتۆمبێلەكەیدا بەهۆی بەرزبوونەوەی ئاستی ئاو و نغرۆبوونی ئۆتۆمبێلەكەیەوە خنكاوە.
لەگەڵ بەرزبوونەوەی ژمارەی قوربانییەكاندا، دەیان كەسی تر برینداربوون و پێشبینیی تۆماركردنی حاڵەتی زیاتری مردن و برینداربوون دەكرێت.
بەهۆی لافاو و زریانەكەوە زیان بەر كەرتی گواستنەوەی ژاپۆن كەوتووە، 801 گەشتی ئاسمانی هەڵوەشێندراونەتەوە و هاتوچۆی بەشێك لە شەمەندەفەرەكان ڕاگیراوە.
میدیای ژاپۆنی دەڵێت، شەوی ڕابردوو زیاتر لە 20 هەزار كەس لە پەناگەكاندا ڕۆژیانكردووەتەوە و دەسەڵاتداران هۆشدارییان داوە بە ملیۆنان كەسی دانیشتووی ناوچەكانی زریانەكە، خۆیان بپارێزن لە لێزمەباران و ڕەشەبا كە خێراییەكەی گەیشتووەتە 234 كیلۆمەتر لە كاتژمێرێكدا.
