لە كاتێكدا كێشمەكێشی دادگای نێوان خۆی و جێرارد پێكێی هاوڕێی پێشووی تەواونەبووە، بەهۆی فێڵكردن لە باجداندا پێدەچێت ژنە گۆرانیبێژ شاكیرا هەشت ساڵ زیندانیبكرێت.
ڕۆژنامەی لاڤانگواردیای ئیسپانی بڵاویكردەوە، پێكێ ئاسوودە نییە و بە تووڕەییەوە دوایین دانیشتنی دادگای تایبەت بە جیابوونەوەی خۆی و شاكیرای بەجێهێشتووە، بەو پێیەی شاكیرا ڕووبەڕووی فشاری كردووەتەوە.
وەك زانیارییەكانی ڕۆژنامەكە ئاشكرایانكردووە، ژنە گۆرانیبێژە كۆڵۆمبییەكە لەبارەی مافی بەخێوكردنی دوو منداڵەكەیانەوە ڕێكناكەوێت، سەرباری ئەوەی پێشتر ڕێككەوتبوون ئەو پرسە بە شێنەیی چارەسەربكەن و نەیگەیەنن بە دادگا.
هاوكاتی ئەو ناكۆكییەی دوای 11 ساڵ لە پێكەوەبوون كەوتووەتە نێوان شاكیرا و یاریزانەكەی بەرشەلۆنەوە، بەپێی سەرچاوەكان بەهۆی كەیسێكی پێشووەوە كە تۆمەتباركراوە بە فێڵكردن لە باجداندا، پێدەچێت شاكیرا بە هەشت ساڵ زیندانیكردن و 23 ملیۆن یۆرۆ سزابدرێت.
