حكومەتی ئێران دەڵێت، بنیادنانی بەنداوی “ئلیسو”ی لەلایەن توركیاوە، ئێران و عێراق دووچاری گرفت دەكات.
ماوەی چەند ساڵێكە توركیا بنیادنانی بەنداوێكی گەورەی لەسەر ڕووباری دیجلە دەستپێكردووە كە دەبێتە دووەم گەورەترین بەنداوی ئەو وڵاتە و ئاوی ڕووباری دیجلە بەڕێژەیەكی زۆر دەگرێتەوە.
عەلی موریدی، بەڕێوەبەری گشتیی نووسینگەی پاراستنی ئاو و خاك لە ڕێكخراوی ژینگەی ئێران دەڵێت، “بەنداوەكە ئەگەری دروستكردنی گرفتی ئاوی لەو وڵاتانەدا زیادكردووە كە دیجلە دەڕژێتە ئاوەكانیانەوە، لەوانە ئێران و عێراق”.
بەپێی وتەی موریدی، بەنداوی “ئلیسو” چوونی ئاو بۆ زەوییە شێدارەكان كەمدەكاتەوە و دەیانكات بە ناوچەی خۆڵبارین، ئەوەش چەندین زیانی گەورەی دەبێت كە دەبنەهۆی پەكخستنی سیستمی ژینگەی ناوچەكە.
