لوقمان وەردی، جێگری سەرۆكی فراکسیۆنی یەکێتی لە پەرلەمانی كوردستان وتارێكی بڵاوكردووەتەوە و تیایدا پارتی بە “کەواسوری بەر لەشکری داگیرکەر” ناودەبات كە “ھەر ڕۆژەی سەنگەری دژایەتی لە ھێزێکی کوردستانی دەگرێت”.
وەردی ڕوو لە پەرلەمانتارانی پارتی نووسیویەتی، “خۆسەپێن حزبەکەی خۆتانە کە بە ڕۆژی ڕووناک پارەی داھاتی نەوتی کوردستان لوش دەدەن و بێباکن بەرانبەر برسیکردنی ھاونیشتمانییانی خۆتان”.
لە درێژەی وتارەكەیدا جێگری سەرۆكی فراکسیۆنی یەکێتی نووسیویەتی، “خۆسەپێن ئێوەن کە ڕۆژانە بە پاساوی بێبنەما چالاکوان و ڕۆژنامەنووسان بە تۆمەتی ھەڵبەستراو، بە پاساوی بێبنەما ڕاپێچی کونجی زیندانەکان دەکەن و ناوبانگی ھەرێمی کوردستانی لە نێوەندە نێودەوڵەتییەکان پێ لەکەدار دەکەن، خۆسەپێن پارتییەکەی خۆتانە کە بووەتە کەواسوری بەر لەشکری داگیرکەر ھەر ڕۆژەی سەنگەری دژایەتی لە ھێزێکی کوردستانی دەگرێت”.
دەقی وتارەكە:-
کێ خۆسەپێنە؟
چۆن ڕووتان دێت باسی حزبی خۆسەپێن بکەن
لوقمان وەردی- پەرلەمانتاری فراکسیۆنی یەکێتی:
خۆسەپێن حزبەکەی خۆتانە کە بە ڕۆژی ڕووناک پارەی داھاتی نەوتی کوردستان لوش دەدەن و بێباکن بەرانبەر برسیکردنی ھاونیشتمانییانی خۆتان.
خۆسەپێن ئێوەن کە ڕۆژانە بە پاساوی بێبنەما چالاکوان و ڕۆژنامەنووسان بە تۆمەتی ھەڵبەستراو، بە پاساوی بێبنەما ڕاپێچی کونجی زیندانەکان دەکەن و ناوبانگی ھەرێمی کوردستانی لە نێوەندە نێودەوڵەتییەکان پێ لەکەدار دەکەن، خۆسەپێن پارتییەکەی خۆتانە کە بووەتە کەواسوری بەر لەشکری داگیرکەر ھەر ڕۆژەی سەنگەری دژایەتی لە ھێزێکی کوردستانی دەگرێت.
ئاخر ئێوە بەو عەقڵییەتە ژەنگاوییە حوکمڕانی دەکەن بۆیە حاڵی ھەرێمی کوردستانتان بەم ڕۆژە گەیاندووە، کەسوکاری شەھید و ئەنفال و کیمیاباران خۆزگە بۆ ڕژێمی دیکتاتۆری داگیرکەر بخوازن؟
لە ئێستادا گوایە ئێوە نیگەرانی دۆخی سلێمانین، ئەی بۆ دێرەلوک و شیلادزێی بریندار، برادۆستی داگیرکراو بۆ بەناھەق شەھیدبوونی ھاوڵاتییانی سڤیل و سووتان و وێرانبوونی دێھات و رەز و باخی ھاوڵاتییانی سەرسنوور چۆن ئارەقەی شەرمەزاری ناڕێژن؟
بەس پێم بڵێن ئێوە چ ڕوویەکتان ھەیە باسی پەکخستنی پەرلەمان دەکەن، ئێوە تاکە سوارچاکی ناشرینکردن و بێبەھاکردنی دامەزراوە دەستووریەکانی ھەرێمن، بێباکن بەرانبەر خراپیی دۆخی ژیان و گوزەرانی ھاوڵاتییان و کەڵەکەبوونی قەیرانەکان، لەجیاتی کاری پێکەوەیی و داکۆکیکردن لە مافی ھاوڵاتییان دەتانەوێت پەرلەمان بکەنە سەکۆی جوێندان و بەکارھێنانی دەستەواژەی ناشرین و مەیدانی بەند و سەما و گۆرانی، ھەر بەجدی ئەوە حکومەتە بەھێز و چاکسازی خوازەکەتان بوو کە بانگەشەتان بۆ دەکرد.
