وەزارەتی دارایی و ئابوریی هەرێمی کوردستان بڕیاریدا بە دیاریکردنی دەرماڵەی “لەبری کەمئەندامی” بە ڕێژەی 50%ی مووچەی بنەڕەتی بەو مەرجەی لە 100 هەزار دینار تێنەپەڕێت.
لە بڕیارێکدا کە واژووی ئاوات شێخ جەناب، وەزیری دارایی هەرێمی کوردستانی لەسەرە هاتووە، پاڵپشت بە ماددەی (3/یەکەم /یەکەم-2)، لە یاسای چاکسازی لە مووچە و دەرماڵە و بەخشین و ئیمتیازاتەکانی خانەنشینی لە هەرێمی کوردستان ژمارە 2ی ساڵی 2020 بڕیاری ئەنجومەنی وەزیران ژمارە (48) لە 2/12/2020، بڕیاردرا بە دیاریکردنی دەرماڵەی ” لەبری کەمئەندامی” بە ڕێژەی 50%ی مووچەی بنەڕەتی بە مەرجێک لە 100 هەزار دینار تێپەڕنەکات.
لە بڕیارەکەدا باس لەوە کراوە، جێبەجێکردنی ئەو بڕیارە بەپێی ڕێژەی کەمئەندامی دەبێت لەلایەن لیژنەیەکی پزیشکیی تایبەتمەندەوە، بەپێی ڕێنماییەکانی وەزارەتی کار و کاروباری کۆمەڵایەتی و وەزارەتی تەندروستی دەبێت.
بەپێی بڕیارەکە، لە کاتی خانەنشینکردنیدا کەسی خاوەن پێداویستیی تایبەت بڕی 100 هەزار دیناری وەک هاوکاری بە شێوەی مانگانە بۆ دابیندەکرێت.
بڕیارەکە لە دوای بڵاوبوونەوەی لە ڕۆژنامەی وەقائعی کوردستان جێبەجێدەکرێت.
