دوانیوەڕۆی ئەمڕۆ لە نزیک گوندی “بەرلوت” لە گەرمیان، ئۆتۆمبێلێكی پۆلیس خۆی کێشا بە ئۆتۆمبێلی هاوڵاتییەکدا و بەهۆیەوە ئۆتۆمبێلەکە سووتا و سێ کەس برینداربوون.
بەپێی زانیارییەکانی تۆڕی میدیایی ئێستا، ئۆتۆمبێلەکەی پۆلیس خۆی کێشاوە بە ئۆتۆمبێلێکی “گۆڵفی تایبەت” دا و وەرگەڕاوە، دواتر ئاگری گرتووە و هاوڵاتییان و پۆلیس ئەو سێ کەسەیان لەناو ئۆتۆمبێلەکەدا دەرهێناوە و بە برینداری ڕزگاریانکردوون.
بەڕێوەبەرایەتیی هاتوچۆی گەرمیان ئاشکرایکردووە، لەناو ئۆتۆمبێلەکەی پۆلیسیشدا دوو کەس برینداربوون.
بەپێی دیمەنەکانی ڕووداوەکە، ئۆتۆمبێلەکەی پۆلیس زۆر زیانی پێنەگەیشتووە، بەڵام ئۆتۆمبێلە تایبەتەکە وەرگەڕاوە و سووتاوە.
