سەرۆكی هاوپەیمانیی فەتح دەڵێت، دیدارەكەیان لە حەنانە ئەرێنی بووە و ڕوونیشیدەكاتەوە، لە چەند ڕۆژی داهاتوودا جارێكی دیكە دەگەڕێنەوە نەجەف.
هادی عامری، سەرۆكی هاوپەیمانیی فەتح پەیامێكی دەربارەی كۆبوونەوەی ئەمڕۆی شاندی چێوەی هەماهەنگی لەگەڵ موقتەدا سەدر، سەرۆكی ڕەوتی سەدر لە نەجەف بڵاوكردەوە و ڕایگەیاند، دیدارەكە ئەرێنی و بەرپرسیارانە و دەربڕی بەرژەوەندیی بەهێزی دەوڵەت و سەركەوتن بوو لە قۆناغی داهاتوودا.
وتیشی، “لە چەند ڕۆژی نزیكی داهاتوودا جارێكی دیكە دەگەڕێینەوە بۆ نەجەف”.
دوانیوەڕۆی ئەمڕۆ چوارشەممە شاندێكی چێوەی هەماهەنگی بەسەرۆكایەتیی هادی عامری سەرۆكی هاوپەیمانیی فەتح سەردانی موقتەدا سەدر ڕێبەری ڕەوتی سەدری كرد.
كۆبوونەوەكە لەسەر داوای موقتەدا سەدر لە ماڵەكەی خۆی لە حەنانە لە نەجەف بەڕێوەچوو، جگە لە عامری، قەیس خەزعەلی ئەمینداری گشتیی عەسائیبی ئەهلی حەق و فالح فەیاز سەرۆكی هاوپەیمانیی عەقدی نیشتمانی ئامادەیبوون و مەبەست لێی تاوتوێكردنی پێكهێنانی حكومەتی نوێی عێراق بوو.
كەمێك لەمەوبەر و دوای تەواوبوونی كۆبوونەوەكە، موقتەدا سەدر ڕێبەری ڕەوتی سەدر لە تویتێكدا ڕایگەیاند، “حكومەتێكی زۆرینەی نیشتمانی پێكدەهێنین كە نە خۆرهەڵاتی و نە خۆرئاوایی بێت”.
لە دوای هەڵبژاردنە پەرلەمانییە پێشوەختەكەی عێراقەوە، سەدر چەندین جار هەمان قسەی دووپاتكردووەتەوە.
