جێگری بەڕێوەبەری گشتیی تەندروستیی سلێمانی ڕایگەیاند، بڕیار و جێبەجێكردنی داخستنی کلینیکی ئەو پزیشکانەی لە دەرەوەی شوێنی کارەکانیان کلینیکیان هەیە بەردەوامە، لە هەندێک شوێنیش بەتەواوی جێبەجێکراوە.
دکتۆر هێرش سەید سەلیم جێگری بەڕێوەبەری گشتیی تەندروستیی سلێمانی بەتۆری میدیایی ئێستای وت، ئەو بڕیارەی پێشتر درابوو بۆ داخستن و گواستنەوەی کلینیکی ئەو پزیشکانەی لە دەرەوەی سنووری كارە فەرمییەكەیانن، ڕانەگیراوە و بەردەوامە لە جێبەجێکردن، لیژنەکانی تەندروستی بەردەوامن لە چاودێریکردنی پرۆسەکە.
دکتۆر هێرش ئاماژەی بەوەکرد، شارۆچکەی دوکان یەکێکە لەو شوێنانەی بڕیارەکەی تێدا جێبەجێکراوە و هیچ پزیشکێک لەو شارۆچکەیەدا نەماوە کە کارەکانی لە دەرەوەی دوکان بێت، هەروەها جێبەجێكردنی بڕیارەكە لەسەرجەم شوێنەکانی دیکەش بەردەوامە.
سەبارەت بە جێبەجێكردنی بڕیارەکە لە ناوشاری سلێمانی، جێگری بەڕێوەبەری گشتیی تەندروستیی سلێمانی دەڵێت، “بڕیارەکە ئەو پزیشکە پسپۆڕییانە ناگرێتەوە کە کارەکانیان لە دەرەوەی شارە و لەناوشاردا کلینیکیان هەیە، چونکە بەشێک لەوانە پسپۆڕییەکانیان پێویستی بە نەشتەرگەریی گەورە هەیە و ئەوانەش لە دەرەوەی شاری سلێمانی ناکرێت”.
جەختیکردەوە، ئەو بڕیارە کاریگەریی نەرێنیی لەسەر کاری پزیشکان نابێت، چ لەناو شاری سلێمانی، چ لە دەرەوەی شار.
پێشتر كە بڕیاری ئەو كلینیكانە درا، باس لە هەفتەیەك مۆڵەت كرا، بەڵام دکتۆر هێرش
دەڵێت، ئەو ماوەیە تەنها بۆ ئاگادارکردنەوەی پزیشکان بووە، نەک ماوەی جێبەجێکردن.
لە بەرواری 25ی ئەیلول بەڕێوەبەرایەتیی گشتیی تەندروستیی سلێمانی بڕیارێکی دەرکرد بۆ داخستن، یان گواستنەوەی کلینیکی ئەو پزیشکانەی کلینیکەکانیان لە دەرەوەی سنووری شوێنی كارە فەرمییەكانیانە.
