20 ملیۆن ئەمریكی كارەكانیان بەجێهێشتوون و ئەوەش مەترسی لەسەر هەردوو كەرتی كارگێڕی و ئابوریی ئەو وڵاتە دروستكردووە.
ڕۆژنامەی واشنتن پۆست ئاشكرایكرد، ئەمساڵ بەهۆی دەستلەكاركێشانەوەی بەكۆمەڵەوە، نزیكەی 20 ملیۆن ئەمریكی كارەكانیان بەجێهێشتوون.
بەپێی زانیارییە فیدراڵییەكانی ئەمریكا كە ڕۆژنامەكە ئاشكرایكردوون، لە هەردوو وەرزی بەهار و هاوینی ڕابردوودا نزیكەی 20 ملیۆن ئەمریكی كارەكانیان بەجێهێشتوون و تەنها لە مانگی ئابدا چوار ملیۆن و 300 هەزار فەرمانبەر و كارگەر، بەشێوەی بەكۆمەڵ دەستیان لەكاركێشاوەتەوە.
ڕاپۆرتەكەی واشنتن پۆست دەڵێت، “46%ی ئەوانەی ڕۆژانە شەفتێكی تەواو كاردەكەن، بەدوای كار و چالاكیی نوێدا دەگەڕێن، وازهێنان لە كار زۆربووە و بووەتە دیاردە و نزیكەی هەموو پیشەسازییەكانی گرتووەتەوە، وەك نووسینگەی سەرژمێریی كار لە ئەمریكا ئاشكرایكردووە.
پسپۆڕانی بواری كارگوزاری لە ئەمریكا دەڵێن، “دەستلەكاركێشانەوەكان كاریگەریی درێژمەودا و بەردەوامیان دەبێت، بەتایبەت لەكاتێكدا ئەو پرۆسەیە هەردوو كەرتی چاودێریی تەندروستی و تەكنەلۆجیای بە چڕی گرتووەتەوە”.
ئەو شارەزا و پسپۆڕانە هۆكاری بەجێهێشتنی كار و دەستلەكاركێشانەوەی فەرمانبەران و كارگەران دەگەڕێننەوە بۆ ئەوەی فەرمانبەران و كارگەرانی بەتەمەن، تووڕەن لەوەی هاوكارە گەنجەكانیان مووچە و پاداشتی زیاتر وەردەگرن.
