وەزارەتی شارەوانی رایدەگەیەنێت، وەزارەتەکەیان پابەندە بە رێكار و یاسا و رێنماییەكان بۆ بەهەمیشەییكردنی فەرمانبەرانی گرێبەست.
وەزارەتی شارەوانی و گەشتوگوزار لە روونکردنەوەیەکدا دەڵێت، بۆ رای گشتی و بە تایبەتی فەرمانبەرانی گرێبەست لە دامودەزگاكانی سەر بە وەزارەتی شارەوانی و گەشتوگوزار رایدەگەیەنین كە وەزارەتی شارەوانی و گەشتوگوزار پابەندە بە رێكار و یاسا و رێنماییەكانی حكومەتی هەرێم و لایەنی پەیوەندیدار بۆ بەهەمیشەییكردنی فەرمانبەرانی گرێبەست.
لە روونکردنەوەکەدا هاتووە، ئەوەی لەڕووی یاسا و رێكارەكانەوە لەسەر وەزارەتمان بووبێت كاری پێویستیان لەسەر كراوە و لە داهاتووشدا لە چوارچێوەی سیاسەتی حكوومەتی هەرێمی كوردستان پابەندین بەو بابەتەوە.
ئەگەر هەر سەرنجێکیشمان هەبووبێت، ئەوا لەبەر بەرژەوەندیی فەرمانبەرانی گرێبەست بووە.
باس لەوەش دەکات، زۆرترین ژمارەی فەرمانبەرانی گرێبەست لە وەزارەتی شارەوانی و گەشتوگوزارن کە ژمارەیان لە 14هەزار فەرمانبەر زیاترە و ویستراوە کە باشترین وردەکاری تێدا بکرێت و مافی هیچ فەرمانبەرێکی گرێبەست پێشێلنەکرێت، چونکە ئاڵۆزییەک لە دانانی گرێبەستەکان هەبووە.
وەزارەتی شارەوانی و گەشتوگوزار دەڵێت، بەشێکی فەرمانبەرە گرێبەستەکان بە ناونیشانێک گرێبەستیان بۆ کراوە گونجاو نییە و لە ئاست ئەو بڕوانامەیە نییە کە هەیانە، دەبێت بەو ناونیشانە هەمیشەیی بکرێن کە هاوشانی بڕوانامەکانیانە، نەوەک بە ناونیشانێک کە لەگەڵ خوێندن و لێهاتوویی و لێوەشاوەیی و بڕوانامەی ئەو فەرمانبەرانە یەکناگرێتەوە.
