سەعید خەتیبزادە وتەبێژی وەزارەتی دەرەوەی ئیران ڕایگەیاند لەچەند ڕۆژی داهاتوودا گفتوگۆکانی ڤیەننا سەبارەت بە پرسی ئەتۆمی دەستپێدەکەنەوە، وتەبێژی یەکێتیی ئەوروپاش ڕەتیدەکاتەوە.
ئاژانسی فرانس پرێز لەزاری وتەبێژی کاروباری دەرەوەی یەکێتیی ئەوروپا بڵاویکردەوە، بەدوری دەزانن لە ڕۆژی پێنج شەممەدا هیچ دیدارێک لەگەڵ ئێراندا ئەنجام بدرێت لە برۆکسل سەبارەت بە گەڕانەوە بۆ ڕێککەوتنی ئەتۆمی.
نەبیلە مەسرالی وتی، “ڕۆژی پێنجشەممە هیچ دیدارێک ئەنجامنادرێت، تائێستا نازانین گفتوگۆکان کەی و چۆن دەستپێدەکەنەوە”.
کەمێک بەر لە لێدوانەکانی وتەبێژی یەکێتیی ئەوروپا، سەعید خەتیبزادە وتەبێژی وەزارەتی دەرەوەی ئێران ڕایگەیاند، “پێویستە کات بەفیڕۆنەدەین بۆ دەستپێکردنەوەی دانوستەکان سەبارەت بە پرسی ئەتۆمی”.
لەلایەکی دیکەوە دوو ئەندامی ئەنجومەنی شورای ئێران ئاشکرایانکرد، “بڕیارە لەم هەفتەیەدا دانوستانەکان لە برۆکسل لەگەڵ وڵاتانی ئەندامی ڕێککەوتنی ئەتۆمی دەستپێبکەنەوە”.
هەر ئەمڕۆ دووشەممە جۆزێف بۆرێل بەرپرسی سیاسەتی دەرەوەی یەکێتیی ئەوروپا ڕایگەیاند، هیوادارن لەماوەیەکی نزیکدا وڵاتانی ئەوروپا و ئێران لەبارەی ئەو پرسەوە گفتوگۆکان دەستپێبکەنەوە، بەڵام هیچ بڕیارێک نییە لەبارەی کۆبوونەوەیان ڕۆژی پێنجشەممە.
