سەرچاوەیەکی ئیسپانی ئاماژە بە بێزاربوونی ئیدین هازارد دەکات لە مەدرید، هەروەها هەوڵەکانی چێڵسی ئاشکرادەکات بۆ گەڕاندنەوەی یاریزانەکە.
ڕۆژنامەی “ئیل ناسیوناڵ”ی کەتەلۆنی بڵاویکردووەتەوە، ئیدین هازارد هەڵەی ستراتیجی یانەی ڕیاڵ مەدریدە، 100 ملیۆن یورۆیان لە گواستنەوەی یاریزانێکدا بەکارخستووە ماوەی سێ ساڵە بچوکترین سوودی بە یانەکە نەگەیاندووە.
سەرچاوەکە نووسیویەتی، هازارد لە شاری مەدرید بێزارە، دەیەوێت کۆتایی بەو کارەساتە بهێنێت کە لە خولی ئیسپانیا دووچاری بووە.
بەپێی زانیارییەکانی “ئیل ناسیوناڵ”، ڕۆمان ئەبرامۆڤیچ-ی خاوەنی چێڵسی سەرسامە بە هازارد و هێشتا پێیوایە باشترینی جیهانە، لەپێناو گواستنەوەشیدا ئامادەیی دەربڕیوە 40 ملیۆن یورۆ پێشکەشی ڕیاڵ مەدرید بکات، یاخود بەشێوازی ئاڵوگۆڕ بەرامبەر ڕیس جەیمس بۆندەکە واژووبکەن.
ئەم زانیارییانە لەلایەن میدیاکانی مەدریدەوە “مارکا و ئەی ئێس” پشتڕاست نەکراوەتەوە، بۆیە هەندێک لە سەرچاوەکان پشتیان بە زانیارییەکانی “ئیل ناسیوناڵ” نەبەستووە.
