قەیرانی ئاو لەنێوان عێراق و ئێراندا جارێکی دیکە سەریهەڵدایەوە و وەزیری سەرچاوەکانی ئاوی عێراقیش دەڵێت، لەگەڵ ئێران نەگەیشتوونەتە هیچ ڕێککەوتنێک سەبارەت بە پشکی ئاوی عێراق.
مەهدی ڕەشید حەمدانی، وەزیری سەرچاوەکانی ئاوی عێراق بە ئاژانسی هەواڵی فەرمیی عێراقی ڕاگەیاندووە، “کارتی فشاری بەهێزمان لەبەردەستدایە بۆ وەرگرتنی مافە ئاوییەکانی عێراق”.
ڕاشیگەیاند، تائێستا لەگەڵ وڵاتی ئێران نەگەیشتوونەتە هیچ ڕێککەوتنێک لەسەر پرسی پشکی ئاوی عێراق.
حەمدانی دەڵێت، “ئاماژە و بەڵگەمان لەبەردەستدایە ئێران لەڕێگەی هەڵکەندن و تونێلەوە دەیەوێت ڕێڕەوە ئاوییەکان بگۆڕێت”، لەگەڵ ئەوەشدا وەزارەتی دەرەوە لەهەوڵەکانی بۆ گەیشتن بەڕێککەوتن لەگەڵ ئێران بەردەوامە.
وەزیری سەرچاوەکانی عێراق ئاماژەی بەوەکرد، “ئێران سەرپێچی یاسا نێودەوڵەتییەکان دەکات و لەوبارەیەوە تارانمان ئاگادارکردووەتەوە بەڵام تائێستا هیچ وەڵامێکیان نەداوینەتەوە”.
جەختیکردەوە، پەنابردن بۆ دادگای نێودەوڵەتی یەکێکە لە کارتەکانی عێراق و وتی، “هیچ وڵاتێک مافی ئەوەی نییە ئاو لە وڵاتانی دیکە بگرێتەوە”.
