كۆمپانیای گوگڵ سەرگەرمی دروستكردنی ئامێرێكی مۆبایلە كە دوو شاشەی دەبێت و دەنووشتێندرێتەوە.
بەپێی ئەو زانیارییانەی ماڵپەڕی “زە ڤێرج” ئاشكرایكردوون، مۆبایلەكە بە سیستمی ئەندرۆید 12 كاردەكات كە سیستمی كارپێكردنی بەشێك لە ئامێرەكانی مۆبایلە و هێشتا نەخراوەتە بازاڕەوە.
ئامێرەكەی گوگڵ ناوی پاسپۆرتە و دوو شاشەی دەبێت بە قەبارەی 7.6 ئینچ، كە یەكێكیان لەكاتی نووشتاندنەوەی مۆبایلەكەدا دەكوژێتەوە.
ئەو ماڵپەڕە كە تایبەتە بە هەواڵ و زانیاریی تەكنەلۆجی، باس لەوە دەكات كە ئامێرەكەی گوگڵ پشتیوانیی نەوەی پێنجەمی ئامێرە زیرەكەكان دەكات و پێشبینی دەكرێت ڕكابەری لەگەڵ ئەو ئامێرانەی هواوی و سامسۆنگدا بكات كە دەنووشتێندرێنەوە.
