یاسادانەرانی ئەمریكا، دوو پڕۆژەیاسایان پێشكەشكردووە بۆ سەپاندنی چاودێریی یاسایی بەسەر پەرەسەندنەكانی ئەفغانستان و ناساندنی تاڵیبان وەك ڕێكخراوێكی تیرۆریستی.
ئەو دوو پڕۆژەیاسایە، لەلایەن ژمارەیەك ئەندامی كۆنگرێسی ئەمریكاوە كە سەر بە هەردوو پارتی كۆماری و دیموكراتخوازەكانن گەڵاڵەكراوە و پێشكەش بە كۆنگرێس كراوە، دەیانەوێت لەڕێگەیانەوە، چاودێری بخرێتەسەر هەر گۆڕانكاری و پەرەسەندنێك كە لە داهاتوودا لە ئەفغانستان ڕوودەدات، بەجۆرێك سەرۆكی ئەمریكا ساڵانە ڕاپۆرتێك لەبارەی دۆخی ئەفغانستان و ڕووداوەكانییەوە پێشكەش بە كۆنگرێس بكات.
ئامانجێكی تری ئەو ئەندامانەی كۆنگرێس، دانانی بزوتنەوەی تاڵیبانە بە ڕێكخراوێكی تیرۆریستی، چونكە وەكخۆیان دەڵێن، “كشانەوەی ئەمریكا لە ئەفغانستان دۆخێكی كارەساتباری هێناوەتەئاراوە” و دژی كۆنترۆڵكردنی ئەفغانستان لەلایەن تاڵیبانەوەن.
بەگوێرەی زانیارییەكان، بەشێك لە یاسادانەران و ئەندامانی كۆنگرێسی ئەمریكا، هەوڵی سەپاندنی فشاری زیاتر بەسەر ئەفغانستاندا دەدەن و دەیانەوێت تا ڕادەی پۆلێنكردنی ئەفغانستان بە “وڵاتێكی پشتیوانی تیرۆر” هەنگاوبنێن.
