میدیاکانی هەرێمی کەتەلۆنیا تاوەکو ئەمڕۆ، یەک شەممە بەردەوامن لە هێرشکردنە سەر داوەری یاری کلاسیکۆ و تەکنەلۆجیای (ڤار).
دوو ڕۆژنامە ناودارەکەی کەتەلۆنیا کە پێکهاتوون لە موندۆ دیپۆرتیڤۆ و سپۆرت، سوورن لەسەر ئەوەی تەکنەلۆجیای (ڤار) لایەنگری کردووە و بەهۆی ئەژمارکردنی پەناڵتی لە دژی کلیمۆنت لانگلێت ئەنجامی یاری کلاسیکۆ گۆڕانکاری بەسەرهاتووە.
موندۆ ئاماژەیکردووە، بەریەککەوتنی نێوان لانگلێتی بەرگریکاری فەرەنسی و سێرجیۆ ڕامۆس ئاساییبووە، بەڵکو خوان مارتینێز مونوێرای داوەری یاری هەڵەیکردووە کاتێک گوێبسیتی ڤار بووە و شارەزایان حاڵەتەکە بە بەریەککەوتن، یاخود ڕاکێشانی ئاسایی نێوان یاریزانان ناویدەبەن.
لەلایەکی دیکەوە ڕۆژنامەی سپۆرتی کەتەلۆنی سەرنجی خستووەتەسەر لێدوانەکانی ڕۆناڵد کومان، هەروەها چاوپێکەوتنی نێوان ڕاهێنەرەکە و خوان مونوێرای داوەر لە کۆتایی یارییەکەدا، کاتێک کومان پێی دەڵێت،” بۆ هەمیشە ڤار لە دژی بەرشلۆنە بەکاردەهێنن، هیوادارم لەبارەی پەناڵتییەکەوە ڕوونکردنەوەمان پێبدەیت”.
لە بەرانبەردا ڕۆژنامەکانی ئیل پایس و لیکیپ و مارکا و ئاس و دەیلی مەیڵ و بێلد سپۆرت ئاماژەیان بە بردنەوە و سەرکەوتنی یانەی شاهانە کردووە، بەبێ ئەوەی ئاماژە بە داوەری یاری و تەکنەلۆجیای ڤار بکەن.
