دوو عەشیرەتی عەرەب، بەرەبەیانی ئەمڕۆ شەممە 24ی تشرینی یەکەم، لە ناوچەی فەزیلیەی بەغداد ناکۆکی کەوتە نێوانیانەوە و پێکدادانی چەکداری لە نێوانیاندا ڕوویدا.
میدیا عێراقییەکان بڵاویانکردەوە، پێکدادانی نێوان ئەو دوو عەشیرەتە لە ناوچەی فەزیلیەی بەغداد بووە و چەکی سوک و مامناوەندیان بەکارهێناوە.
ئاماژەبەوەشکراوە کە هێزە ئەمنییەکانی ئەو ناوچەیە دوای ڕێگرییەکی زۆر توانیویانە بچنە ناوچەکە و دەستوەردان بکەن لە پێکدادانەکەدا و کۆتاییپێبهێنن، هەروەها هێزی ئەمنی زیاتر ڕەوانەی ئەو ناوچەیە کراوە.
سەرچاوە عێراقییەکان تاوەکو ئێستا قەبارەی زیانە گیانی و مادییەکانی ئەو پێکدادانەیان ئاشکرانەکردووە.
ناوچەکانی ناوەڕاست و باشووری عێراق ناوبەناو ڕووبەڕووی ئەمجۆرە پێکدادانانە دەبنەوە، هێزە ئەمنییەکانیش توانایەکی کەمیان هەیە لە دەستێوەردان لەم پێکدادانەدا چونکە لایەنگرانی ئەو خێڵ و عەشیرەتانە خاوەنی چەکی جۆراوجۆرن.
