ئەنتۆنیۆ گۆتێرێش ئەمینداری گشتیی نەتەوە یەکگرتووەکان، کریستیان ڕیچەر-ی وەک ڕاوێژکاری تایبەت و سەرۆکی تیمی لێکۆڵینەوە لە تاوانەکانی داعش لە عێراق دیاریکرد.
پیشتر کەریم ئەسەد ئەحمەدخان-ی بەریتانی لەو پۆستەدا بوو، کە لە تەمموزی 2018دا دەستبەکاربوو و لە 15ی حوزەیرانی ڕابردوو دەستیلەکارکێشایەوە، بڕیارە دوای ڕاگەیاندنی، کریستیان ڕیچەر جێگەی بگرێتەوە و ببێتە سەرۆکی (UNITAD).
لە ساڵی 2017 نەتەوە یەکگرتووەکان بەبڕیاری 2379، تیمێکی تایبەتی بۆ پاڵپشتیکردنی هەوڵە ناوخۆییەکان بۆ لێپرسینەوەی داعش پێکهێنا، لەڕێگەی کۆکردنەوە و پاراستی بەڵگەی پێویست سەبارەت بە ئەنجامدانی تاوانەکانی جەنگ، تاوانەکانی دژی مرۆڤایەتی و کۆمەڵکوژی کە داعش لە عێراق ئەنجامیداون.
ڕیچەر پێشتر سەرۆکی یەکەی تاوانەکانی جەنگی بەرپرس لە دادگاییکردن و سزادانی ئەو هاوڵاتییە ئەڵمانییانە بووە کە پەیوەندییان بە تاوانە نێودەوڵەتییەکانەوە هەبووە کە لەشوێنی دیکەی وەک عێراق و سوریا ئەنجامدراون، لەوانەش کۆمەڵکوژیی ئێزدییەکان لە عێراق لە ساڵی 2014دا.
