حەبیب نور محەمەدی ڕووسی پاڵەوانی (UFC) بە ڕاگیرکردنی هونەری خنکێنەر جاستن گایزجی ئەمریکی کوتا بەزەویدا و بردنەوەی ژمارە 29ی لە ژیانی وەرزشیدا تۆمارکرد.
سەیر لەوەدابوو، خابیبی ناسراو بە “جەنگاوەرە موسڵمانەکە” سەرەڕای بردنەوە و پارێزگاریکردن لە پشتوێنی پاڵەوانی جیهان بۆ کێشی “لایتوایت”، بەڵام بەشێوەیەکی چاوەڕواننەکراو وازهێنانی لە بواری هونەرە جەنگییەکانی (UFC) ڕاگەیاند.
لە وەڵامی پرسیاری پێشکەشکاری پاڵەوانێتییەکەدا ڕایگەیاند، کە بەهۆی لەدەستدانی باوکییەوە بەهۆی ڤایرۆسی کۆرۆنا چیتر گڕوتینی یاریکردنی نەماوە و وازهێنان بە باشترین بڕیار دەزانێت.
چەند مانگێک لەمەوبەر و دوای ئەنجامدانی نەشتەرگەری دڵ، باوکی خابیب بەهۆی تووشبوونی بە ڤایرۆسی کۆرۆنا گیانی سپارد، لەو کاتەوە تاوەکو ئێستا کوڕەکەی کە پاڵەوانی جیهانە هیچ دەرکەوتنێکی نەبووە تەنها ڕوبەڕوبوونەوەی ئەمشەو بەرانبەر گایزجی نەبێت.
