ئەمریکا ئامادەکاری بۆ ئەنجامدانی هێرشی زیاتر لەلایەن داعشەوە دەکات لە کابول و دەڵێت، ئەگەری هەیە بە موشەک یان ئۆتۆمبێلی بۆمبڕێژکراو هێرشەکانی داهاتوویان ئەنجامبدەن.
ڕۆژنامەی واشنتۆن پۆستی ئەمریکی بڵاویکردەوە، هێزەکانی ئەمریکا ئامادەکارییان بۆ هێرشی دیکەی داعش کردووە لە ئەفغانستان و پێشبینی دەکەن لە هێرشەکانی داهاتوویاندا ئۆتۆمبێلی بۆمبڕێژکراو و موشەک بەکاربهێنن.
ئەمریکا کاری گواستنەوەی هێزەکانی و ئەوانەی کاریان لەگەڵدا دەکەن لە فڕۆکەخانەی کابولەوە خێراتر دەکەن بەتایبەت دوای دوو هێرشە خۆکوژییەکەی دوێنێی فڕۆکەخانەکە کە هەزاران هاوڵاتیی سڤیلی کردەئامانج و ژمارەیەک سەربازی ئەمریکیش کوژران، ئەمریکا ڕایگەیاندووە ئەگەری هەیە بەرلە کۆتاییهاتنی پرۆسەی گواستنەوەی سەربازانی ئەمریکا لە ئەفغانستان داعش هەوڵی ئەنجامدانی هێرشی دیکە بدات.
هێرشەکەی دوێنێی فڕۆکەخانەی کابول و کوژرانی زیاتر لە 15 سەربازی ئەمریکی لەکاتی جێبەجێکردنی بڕیاری جۆ بایدن بۆ کۆتاییهێنان بە ئەرکەکانی وڵاتەکەی لە ئەفغانستان دەکرێت ببێتە کارەساتێک بۆ ماوەی سەرۆکایەتیی بایدن و دۆخێکی چاوەڕواننەکراوی بۆ دروستبکات.
