ڕوانگەی سوری بۆ مافەکانی مرۆڤ ڕاپۆرتێکی لەبارەی دۆخی ژیانی خەڵکی عەفرین-ـەوە بڵاوکردووەتەوە و ئاشكرایکردووە، ئەندامانی گروپی چەکداری “سوڵتان موراد”ی وەفاداری تورکیا چەندین تاوانیان بەرامبەر خەڵکی عەفرین ئەنجامداوە، لەوانە ڕفاندن و کوشتنی دانیشتووانی ئەو ناوچەیە.
بەپێی ڕاپۆرتەکە، دوێنێ تەرمی هاوڵاتییەکی 50 ساڵەی کورد لەناو باخێکی زەیتووندا دۆزراوەتەوە، کە پێشتر لەلایەن گروپی چەکداری سوڵتان مورادەوە ڕفێندرابوو، بە دەست و چاو بەستراوی کوژراوە.
هاوکات ڕاپۆرتەکە ئاماژە بەوەدەکات، تا ئێستا 30 کوردی دانیشتووی عەفرین، لەلایەن ئەو گروپە چەکدارەوە ڕفێندراون و هیچ هەواڵێکیان نییە.
ڕاپۆرتەکە ئاشکرایکردووە، سێ گوندی عەفرین لەلایەن گروپی سوڵتان مورادەوە گەمارۆدراون و ڕێگەنادرێت دانیشتووانی گوندەکان بچنە دەرەوەی گوندەکانیان.
پێشتر ڕێکخراوی مافەکانی مرۆڤ لە سوریا ئاشکرایکردبوو، لەماوەی شەش مانگی ڕابردوودا، تورکیا لە عەفرین 38 تاوانی کوشتن و 303 ڕفاندنی ئەنجامداوە، داواشی کردبوو لیژنەیەکی نێودەوڵەتی بچێتە شارەکە بۆ بینینی ڕووداوەکان.
گروپی چەکداری سوڵتان موراد پێشتر داوایان لە خەڵکی عەفرین کردبوو هەرکەسێک دەگەڕێتەوە ماڵ و زێدی خۆی پێویستە پارە بەوان بدات و بۆهەر خێزانێک هەزار دۆلار وەرگیراوە، بەپێچەوانەوە ڕێگەیان نەداوە هیچ کەسێک بگەڕێتەوە زێدی خۆی.
