كۆمسیۆنی هەڵبژاردن ڕایدەگەیەنێت، بەو بودجەیەی لەبەردەستدایە ناتوانرێت كامێرا لە ناوەندەكانی دەنگداندا دابنرێت.
جومانە غلای، وتەبێژی كۆمسیۆنی باڵای سەربەخۆی هەڵبژاردنەكان لە عێراق ڕایگەیاند، كۆمسیۆن زیاتر لە 60 هەزار ناوەندی دەنگدانی هەیە كە لەنێوان دەنگدانی تایبەت و دەنگدانی ئاوارەبووان و بەندینخانە و دەنگدانی گشتی دابەشدەبێت، بۆیە فەراهەمكردنی كامێرا بۆ هەموو وێستگەكان پارەیەكی زۆری دەوێت.
وتیشی، “بودجەی هەڵبژاردن توانای ئەو خەرجییەی نییە كامێرا لە هەموو وێستگەیەكی دەنگداندا دابنرێت”.
غلای ئەوەشی خستەڕوو، چاودێرانی ناوخۆیی و بریكاری پارتە سیاسییەكان و میدیاكان، سەرجەمیان دەبنە چاودێر بەسەر پڕۆسەی هەڵبژاردنەوە.
دوپاتیشیكردەوە، بریكاری پارتە سیاسییەكان و دەنگدەران مافی ئەوەیان هەیە سكاڵا بكەن، ئەگەر هەر پێشێلكارییەك لە ڕۆژی دەنگداندا هەبێت، بەمەرجی بوونی بەڵگە.
وتەبێژی كۆمسیۆن ئاماژەی بەوەشكرد كە چاودێرانی نێودەوڵەتی مافی سكاڵاكردنیان نییە، كارەكەیان تەنها لە پێشكەشكردنی ڕاپۆرت بۆ لایەن و ڕێكخراوەكانی خۆیان كورت دەبێتەوە.
بڕیارە لە 10ی تشرینی یەكەمی داهاتوو هەڵبژاردنی پێشخراوەی ئەنجومەنی نوێنەرانی عێراق بەڕێوەبچێت، لەو چوارچێوەیەشدا كۆمسیۆن ئامادەكاری دەكات.
