ماڵپەڕی “healthline”ی پزیشکی بڵاویکردووەتەوە کە ڕووتانەوەی 50 تاکو 100 تاڵەموو ڕۆژانە شتێکی ئاساییە و قژ بە هەمان خێرای گەشە دەکاتەوە، بەڵام گەشەنەکردنی مووەکان شتێکی ئاسایی نییە و بە تێپەڕینی کات دەبێتە کێشە و ڕووتانەوەی قژی لێدەکەوێتەوە. هەروەها چوار هۆکاری خستووەتەڕوو کە دەبنە هۆی ڕووتانەوەی قژ.
هۆکارە بۆماوەییەکان ڕۆڵێکی گەورە دەگێڕن لە ڕووتانەوەی قژدا، بەجۆرێک کە زۆرێک لە پیاوان و ژنان بەدەست تەنکبوونی قژیانەوە دەناڵێنن کە لە سییەکان و چلەکانی تەمەندا دەستپێدەکات.
فشاری دەروونی
فشار بە یەکێک لە کێشە گەورە تەندروستییەکان دادەنرێت، وا باوە کە دەرئەنجامی بەرزبوونەوەی ئاستی فشار دەبێتە هۆی ڕووتانەوەی قژ، هەروەها شۆکی جەستەیی و سۆزداری هۆکارن بۆ ڕووتانەوەی قژ.
کێشە تەندروستییەکان
هەندێک دۆخی تەندروستی دەبنە هۆی ڕووتانەوەی قژ، لەوانەش غودەی دەرەقی و کەمخوێنی و هەوکردنی پێستی سەر. ئەمە جگە لەوەی بەکارهێنانی دەرمانی جیاوازی نەخۆشییە جیاوازەکان هۆکارێکی دیکەی قژڕووتانەوەن، بۆ نموونە؛ شێرپەنجە، بەرزیی فشاری خوێن، هەوکردنی جومگەکان و کێشەکانی دڵ.
گۆڕانی هۆڕمۆن
هەڵبەزودابەزەکانی ژیان، لەناویاندا نەخۆشی و شۆکی سۆزداری و ئەو گۆڕانکارییە هۆڕمۆنییانەی لە ماوەکانی دووگیانی و باڵغبوون و وەستانی سووڕی مانگانە ڕوودەدەن، لە ڕیزی ئەو هۆکارانە ئەژمار دەکرێن کە دەبنە هۆی قژڕووتانەوە.
