هەپەگە دووبارە داوا لە پارتی دیموكراتی كوردستان دەكات لەبارەی چارەنووسی پۆلێك گەریلاوە ڕوونكردنەوە بدات.
چەند ڕۆژێك لەمەوبەر هێزەكانی پاراستنی گەل (هەپەگە) لە ڕاگەیەندراوێكدا ئاشكرایكرد، 26ی ئەم مانگە پۆلێك گەریلا لەلایەن هێزەكانی پارتییەوە گەمارۆدراون و هێرشكراوەتە سەریان و چارەنووسیان نادیارە، داوای لە پارتی كرد لەبارەی چارەنووسی ئەو گەریلایانەوە ڕوونكردنەوە بدات.
دووبارە هەپەگە ڕاگەیەندراوێكی بڵاوكردووەتەوە و زانیاریی نوێی لەبارەی پۆلە گەریلاكەوە خستووەتە ڕوو، دەڵێت، “پێشتر بۆ ڕایگشتی و گەلەکەمان ڕامانگەیاندبوو، کە لە ڕۆژی 26ی تەمموزەوە پەیوەندیمان لەگەڵ پۆلێک لە هەڤاڵانمان لە گوندی بێخمەی سەر بە دەڤەری خەلیفان لە باشووری کوردستان پچراوە، چاوەڕوانی ڕاگەیەندراوی پەدەكە-ین لەوبارەیەوە”.
هەپەگە لەبارەی ناسنامەی گەریلاكانەوە نووسیویەتی، “ئەو پۆلە لە سێ گەریلا بە ناوەکانی فەرماندە سەروەر سەرحەد، فەرماندەی ئایالەتی خواکورک، وەرگەش چراڤ و دژوار بەرخۆدان پێکدەهاتن، بڕیاربوو بۆ بەجێهێنانی ئەرکێک لە خەلیفانەوە بڕۆنە هەرێمی بادینان، بەڵام لە ئەنجامی هێرشێکدا لە گوندی بێخمە لەلایەن هێزەکانی پەدەکەوە، پەیوەندیمان بەو سێ هەڤاڵەمانەوە نەماوە”.
لەسەر چارەنووسی ئەو گەریلایانە تائێستا لەلایەن پارتی دیموكراتی كوردستانەوە هیچ زانیارییەک ڕانەگەیندراوە، بۆیە هێزەكانی پاراستنی گەل دووبارە داوای وەڵامی فەرمی لە پارتی دەكات.
