بەرگریکاری فەرەنسی یانەی ڕیاڵ مەدرید، ڕافائێل ڤاران ئۆفەرەکانی بۆ نوێکردنەوەی بۆندەکەی ڕەتکردووەتەوە و لەگەڵ یانەی مانچستەر یونایتد هاتووەتە سەرهێڵ.
بەپێی زانیارییەکانی دەیلی میرەر، بۆندی ڕافائێل ڤاران لە هاوینی 2022 کۆتاییدێت، سەرەڕای ئەوەی بەڕێوەبەرانی ڕیاڵ مەدرید بەر لە پڕۆسەی نوێکردنەوەی بۆندی لوکا مۆدریچ و لوکاس ڤاسکێز و سێرجیۆ ڕامۆس دەستیان بە دانوستاندن کردووە لەگەڵیدا، بەڵام تاوەکو ئێستا ڕەزامەندی بەرامبەر ئۆفەرەکان نیشاننەداوە.
هەمان سەرچاوە نوسیویەتی، لە ئەگەری بەردەوامبوونی کێشەکانی نێوان ڕیاڵ و ڤاران بەم شێوەیەی ئێستا، یانەی شاهانە لە هاوینی 2021 ئامادەیی دەردەبڕن بەرامبەر بە 60 ملیۆن یورۆ دەستبەرداریبن.
میرەر جەخت لەوە دەکاتەوە، ڤاران پێشوەخت ئامادەکاری بۆ حاڵەتی فرۆشتنی کردووە و لەگەڵ یانەی مانچستەر یونایتد لەسەرهێڵە، تەنانەت ئۆفەرەکانی یانەی پاریس سان جێرمانی ڕەتکردووەتەوە و پێیوابووە یاریکردن لە خولی فەرەنسا لە ئێستادا لە پێشەنگی خەونەکانیدا نییە.
