ئەنجومەنی پێداچوونەوەی دەستوری ئێرانی ڕایگەیاند کە زیاتر لە چوار هەزار و 974 پێشێلکاری لەلایەن چاودێرانی هەڵبژاردنەکانەوە تۆمارکراون.
عەباس عەلی کەدخدایی وتەبێژی پێداچوونەوەی دەستوری ئێران ڕایگەیاند، لە بەرەبەیانی ئەمڕۆوە کە ناوەندەکانی دەنگدان کراونەتەوە چوار هەزار و 974 پێشێلکاری لەلایەن لیژنەکانی چاودێریی هەڵبژاردنەکانەوە تۆمارکراون.
ئاماژەی بەوەشکردووە کە سکاڵا لەبارەی بەردەوامیی بانگەشەی کاندیدەکان و کەمبوونەوەی پسوڵەی دەنگدانەکان ژمارەیەکی دیکە لەم کێشانە تۆمارکراون.
ڕاشیگەیاند، بەشداریکردن لە هەڵبژاردنەکان زۆر باشبووە.
بەیانیی ئەمڕۆ هەینی ناوەندەکانی دەنگدان بۆ بەڕێوەچوونی پرۆسەی دەنگدانی هەڵبژاردنی سەرۆکایەتیی ئێران کرانەوە کە نزیکەی 59 ملیۆن کەس مافی دەنگدانیان هەیە.
لە هەڵبژاردنی سەرۆکایەتیی ئێراندا چوار کاندید کێبڕکێی وەرگرتنی پۆستی سەرۆک کۆماری ئێران دەکەن ئەوانیش، ئیبراهیم ڕەئیسی سەرۆکی دەسەڵاتی دادوەریی ئێران، ئەمیر حەسەن قازی جێگری سەرۆکی ئەنجومەنی شورای ئێران، عەبدولناسر هیمەتی پارێزگاری بانکی ناوەندی و موحسین ڕەزایی ئەمینداری سیستمی بەرگریی ئێران.
پێشتر مەحمود ئەحمەدی نەژادی سەرۆکی پێشووی ئێران رەتیکردەوە بەشداری هەڵبژاردنەکان بکات و ڕایگەیاند، “ئەنجامەکان ڕوونن”.
