بەرپرسانی ئەمریکا ئاشکرایانکرد کە جۆ بایدن دەیەوێت بەر لە دەستبەکاربوونی سەرۆکی نوێی ئێران سەبارەت بە دۆسییەی ئەتۆمی ئەو وڵاتە بگەنە ڕێککەوتن.
ئەو بەرپرسە ئەمریکیانە ڕایانگەیاندووە، کە سەرۆکی ویلایەتە یەکگرتووەکانی ئەمریکا پێیوایە بەردەوامیی گفتوگۆکان سەبارەت بە دۆسیەی ئەتۆمی ئێران تا مانگی ئاب کارێکی مەترسیدارە و دەبێت بەرلە دەستبەکاربوونی سەرۆکی نوێی ئەو وڵاتە ڕێککەوتن بکرێت.
بەرپرسانی ئەمریکا ئاماژەیان بۆ ئەوەکردووە، ئەگەری هەیە ئەمریکا لە ماوەی چەند هەفتەی داهاتوودا لەگەڵ ئێران بگاتە ڕێککەوتن.
ئێستا گفتۆگۆکانی ڤیەننا سەبارەت بە دۆسیەی ئەتۆمیی ئێران بەردەوامە و پێدەنێتە شەشەم گەڕی دانوستانەکانیەوە.
پێشتر وتەبێژی وەزارەتی دەرەوەی ئەمریکا نێد پرایس ڕایگەیاند، هیچ خشتەیەکی زەمەنیی دیاریکراو بۆ گەڕی شەشەمی دانوستانەکان نییە و ئاستەنگەکانی بەردەم گەیشتن بە ڕێککەوتن هێشتا ماون.
پێشتریش بەرپرسانی ئەوروپی ئاشکرایانکرد کە دانوستانەکان بەردەوام دەبن و هەڵبژاردنەکانی ئێران نابنە هۆکاری ڕاگرتنی کۆبوونەوەکانی ڤیەننا.
