وەزارەتی خوێندنی باڵای هەرێم بڕیارێکی لە بەرژەوەندی سێ یەکەمەکانی زانکۆکان دەرکرد، ئەویش بە داشکاندنی کرێی خوێندنەکانیان لە ماستەر بۆ ساڵانی 2019 و 2020.
بەگوێرەی ڕاگەیەندراوێكی وەزارەتی خوێندنی باڵای هەرێم، “لە کۆبوونەوەی ئەنجومەنی وەزارەت و بەمەبەستی هاندان و پاڵپشتی کردنی سێ یەکەمەکانی بەشە زانستییەکانی زانکۆکانی کوردستان، کە تا ئێستا دانەمەزراون، ئەنجومەنی وەزارەتی خوێندنی باڵا و توێژینەوەی زانستی بڕیاریدا لە خوێندنی ماستەر بۆ ساڵی (2019-2020٠) کە لە زانکۆکان وەرگیراون بەشێوازای پارالێل، یەکەمەکان بە ڕێژەی (75%) و دووەمەکان بەڕێژەی (50%) و سێیەمەکان بەڕێژەی (30%) لە کرێی خوێندنی ساڵی دووەمیان دادەشکێنرێت”.
هەر لەڕاگەیەندراوەكە هاتووە، “لەچوارچێوەی تاوتوێکردنی بەرنامەی کاری کۆبونەوەی ئەنجومەنی وەزارەت، پاڵپشت بە دوو پرۆپۆزەڵی زانکۆی پۆلیتەکنیکی سلێمانی و یاداشتەکانی دەزگای سەرپەرشتی و دڵنیایی جۆری لە وەزارەت، ئەنجومەنی وەزارەت بڕیاریدا بە کردنەوەی خوێندنی ماستەری پیشەیی (MBA) ، دکتۆرای پیشەیی (DBA) هەروەها کردنەوەی سەنتەری خوێندنی پیشەیی یەک ساڵە بۆ دەرچوانی خوێندنگە ئامادەییە زانستی و وێژەییەکان و پەیمانگە پێنج ساڵییەکان، لە زانکۆ پۆلیتەکنیکیەکانی هەرێمی کوردستان .”
لەبڕگەیەکی دیکەی کۆبونەوەکەدا ناوی کۆلێژی تەکنیکی تەندروستی لە زانکۆ پۆلیتەکنیکیەکانی هەرێمی کوردستان گۆڕدرا بۆ کۆلێژی تەکنیکی تەندروستی و پزیشکی هاوشێوەی کۆلێژە تەکنیکییەکانی عێراق .
لای خۆیەوە ئارام محەمەد وەزیری خوێندنی باڵا ئاماژەی بەوەكرد، نایانەوێت زانکۆ تەنها بڕوانامە ببەخشێت و فەرمانبەر بۆ کەرتی گشتی ئامادەبکات، بەڵکو پێویستە زانکۆ کارامەیی و پیشەیی بۆ خوێندکارانی دروستبکات، تا دوای تەواوکردنی خوێندن بتوانن دەرفەتی کار بۆ خەڵکی دیکە بڕەخسێنن و لە بازاڕی کاری کوردستاندا هەلی کاری گونجاویان بۆ بەدەست بهێنن.
