یانەی بەرشلۆنەی ئیسپانی، بەفەرمی بۆندی ئیمێرسۆنی بەرازیلی لە یانەی ڕیاڵ بیتیسەوە واژووکرد.
دوای گواستنەوەکانی سێرجیۆ ئەگوێرۆ و ئیریک گارسیا، ئەمڕۆ چوارشەممە یانەی بەرشلۆنە بەفەرمی و بە تێچووی نۆ ملیۆن یورۆ بەندی گەڕاندنەوەی ئیمێرسۆنی بەرازیلی لە یانەی ڕیاڵ بیتیسەوە کاراکرد.
لە ڕاگەیاندراوێکی فەرمیی یانەی بەرشلۆنەدا هاتووە، “یانەی بەرشلۆنە ڕیاڵ بیتیسی لە بڕیاری کۆتایی خۆی بە کاراکردنی بۆندی گەڕاندنەوەی ئیمێرسۆن ئاگادارکردووەتەوە، یاریزانەکە بە خواستن لە دوو کۆتا وەرزدا بۆ یانە ئەندەلوسییەکە یاریکردووە، بڕیارە لە ڕێکەوتی یەکی تەموزی 2021وە پەیوەندی بە بەرشلۆنەوە بکات”.
بەپێی زانیارییەکان، بەرشلۆنە بڕی نۆ ملیۆنی بۆ گەڕاندنەوەی یاریزانەکە پیشکەشی بیتیس کردووە، بەوشێوەیەی لە پێشوودا ڕێککەوتنی لەسەرکراوە.
ئیمێرسۆن تەمەنی 22 ساڵە و لە پێگەی بەرگریی باڵی ڕاست یاریدەکات، لەم وەرزەدا یەکێکبووە لە باشترینەکانی لالیگا لە پێگەکەیدا.
