بڕیارە ئەمڕۆ خۆپیشاندانێكی بەرفراوان لە بەغداد بە ئامادەبوونی نوێنەرانی خۆپیشاندەرانی شارەكانی دیكەی عێراق بەڕێوەبچێت.
بەپێی میدیاكان لە شەوی ڕابردووەوە هێزە ئەمنییەكان لە شەقامە سەرەكییەكان و نزیك گۆڕەپانەكانی ئەندەلوس، فیردەوس، كەهرمانە و تەحریر وەك ئامادەكارییەك بۆ خۆپیشاندانەكەی ئەمڕۆ، بڵاوەیانپێكراوە.
خۆپیشاندانەكە لەژێر دروشمی “كێ كوشتمی؟” دەبێت، بەمەبەستی فشارخستنەسەر دەسەڵاتداران بۆ ئاشكراكردن و دەستگیركردنی بكوژانی چالاكوانان و خۆپیشاندەران و ڕادەستكردنیان بە دادگا.
چالاكوانان و گروپەكانیان ماوەی چەند ڕۆژێكە لە ئامادەكاریدان بۆ ڕێكخستن و ئەنجامدانی خۆپیشاندانەكە و پێشبینیدەكرێت ببێتە دەستپێكی سەرهەڵدانەوەی ناڕەزایەتییەكان، دوای دامركانەوەی خۆپیشاندانەكانی پێشوو، كە بە “تشرین” ناسرابوو و لە 1ی تشرینی یەكەمی 2019 سەریهەڵدا.
بەپێی میدیاكان، چالاكوانان سێ شوێنیان وەك ناوەندی بەڕێوەچوونی خۆپیشاندانەكان دیاریكردووە، ئەوانیش، گۆڕەپانەكانی فیردەوس، تەحریر و نسور-ە لە بەغداد.
دروشم و هوتافی خۆپیشاندەران پەیوەندیدارە بە دژایەتیی گەندەڵی، لێپێچینەوە لە بكوژانی خۆپیشاندەران و چالاكوانان و هەروەها بوونی چاودێریی نێودەوڵەتی بەسەر هەڵبژاردنەكانەوە.
ساڵی ڕابردوو بە بەڵێنی مستەفا كازمی، سەرۆك وەزیرانی عێراق دەربارەی بەجێگەیاندنی داخوازییەكانیان، خێوەتی مانەوەی خۆپیشاندەران لە بەغداد هەڵگیرا.
