سەرۆكایەتيی ئەنجومەنی نوێنەرانی عێراق 31ی ئەم مانگەی وەك وادەی بانگهێشتكردنی وەزیری دارایی بۆ لێپرسینەوە دیاریكرد.
بەپێی نوسراوێكی سەرۆكایەتيی ئەنجومەنی نوێنەرانی عێراق، كە ئەمڕۆ یەكشەممە ئاڕاستەی نوسینگەی عەلی عەلاوی وەزیری دارایی كردووە، تیایدا هاتووە، ڕۆژی 31 ی مانگ، كە دەكاتە ڕۆژی یەكشەممەی داهاتوو، وەكو وادەی لێپرسینەوە لە عەلی عەللاوی دیاریكراوە.
بڕیاربوو پێش پەسەندكردنی بودجە لە مانگی ئازاردا پەرلەمان لێپرسینەوە لە وەزیری دارایی بكات، بەڵام بەهۆی یاساكەوە ئەو پرسە دواكەوت.
لەماوەی رابردوشدا چەندین جار كوتلەكانی نێو پەرلەمان داوایان كردبوو، پرسی بانگهێشتكردنی وەزیری دارایی بخرێتە كارنامەی كۆبونەوەكانی پەرلەمانەوە.
پێشتریش ڕەحیم عەبودی، ئەندامی دەستەی گشتیی ڕەوتی حیكمەی نیشتمانی ڕایگەیاندبوو، كازمی بڕیاریداوە گۆڕانكاری لە پێنج وەزیری كابینەی حكومەتەكەیدا بكات.
ئاشكراشیكردبوو، ئەو وەزارەتانەی كازمی بڕیاری گۆڕینی داون، بریتین لە وەزارەتەکانی دارایی، کشتوکاڵ، پیشەسازی، بازرگانی و تەندروستی.
عەبودی جەختیشی لەوەکردەوە، “بەشێك لە كوتلەكانی نێو پەرلەمان دەیانەوێت، پێش گۆڕینی وەزیری دارایی، لە پەرلەمانەوە متمانەی لێوەرگیرێتەوە”.
