سەركردەیەكی دەوڵەتی یاسا، كە هاوكات پەرلەمانتاریشە، بە كۆرۆنا گیانیلەدەستدا، بووە پێنجەم پەرلەمانتاری عێراق بەو پەتایە گیانلەدەستدەدات.
عەدنان ئەسەدی، ئەندامی ئەنجومەنی نوێنەرانی عێراق و سەركردە لە فراكسیۆنی دەوڵەتی یاسا، ئەمڕۆ پێنجشەممە، گیانیلەدەستدا، كە بەپێی میدیا عێراقییەكان، پەرلەمانتارەكە بەهۆی لێكەوتەكانی پەتای كۆرۆناوە و پاش تێكچوونی باری تەندروستی، گیانیلەدەستداوە،.
بەر لە دوو هەفتە، نوسینگەكەی، توشبوونی ئەسەدی بە ڤایرۆسی كۆرۆنا و هێشتنەوەی لە نەخۆشخانە ڕاگەیاند، بەهۆی تێكچوونی باری تەندروستییەوە.
ئەسەدی دەبێتە پێنجەم پەرلەمانتار، كە بەهۆی لێكەوتەكانی كۆرۆناوە گیانلەدەستبدات، پاش گیانلەدەستدانی هەریەك لە (غیدا‌ء كمبش، عەلی عەبودی، ئارام باڵەتەیی و حسێن زوهەیری).
توشبوون بە كۆرۆنا لە عێراق بە گشتی و لەنێو پەرلەمانتاراندا بەتایبەت زیادیكردووە، هەفتەی ڕابردوو عەلی بدێری، ئەندامی ئەنجومەنی نوێنەران ئاشكرایكرد، بەمدواییە 50 پەرلەمانتار توشبوونیان بە كۆرۆنا یەكلابووەتەوە.
بەوتەی ئەو پەرلەمانتارە، زیادبوونی توشبووان ڕەنگە ببێتە هۆی پەكخستنی كارەكانی پەرلەمان و دواكەوتنی دانیشتنەكانی.
