ڕاهێنەری پۆرتوگالی، جوزێ مۆرینیۆ دوای دەستبەرداربوونی لە پۆستی ڕاهێنەری هەر یانەیەک بڕێک پارە وەک پاداشتی هەڵوەشاندنەوەی بۆندەکەی وەردەگرێت و لەم بوارەشدا زۆرترین داهاتی بەدەستهێناوە.
بەپێی داتاکانی ڕۆژنامەی زە سەنی بەریتانی، دوای یەکسانبوونی تۆتنهام بەرانبەر ئێڤەرتۆن (2-2) مۆرینیۆ هەموو چانسێکی بۆ گرتنەوەی یەکێک لە چوار پلەی سەرەتای پریمەرلیگی لەدەستداوە، هەروەها شکستهێنانی بەرانبەر یانەی دینامۆ زاگریب لێدانێکی دیکەیە و لە قۆناغی چارەکی کۆتایی خولی ئەوروپی بێبەشیکردوون،
هەموو ئەمانە هۆکارێکبوون بۆ دوورخستنەوەی “سپێشەڵ وەن” لە تۆتنهام، لە پای دوورخستنەوەشی بڕی 15 ملیۆن پاوەندی زیادەی بۆندەکەیی پێبەخشراوە.
پاداشتی دوای دوورخستنەوە بۆ مۆرینیۆ لە کۆی ژیانی وەرزشییدا 77.5 ملیۆن پاوەند بووە.
دوای دوورخستنەوەی لە یانەی چێڵسی (سەردەمی یەکەم 2007/2008) بڕی 18 ملیۆنی وەرگرتووە، هەروەها لە وەرزی (2012/2013) دوای دوورخستنەوەی لە ڕیاڵ مەدرید بڕی 17 ملیۆنی دیکەی بەدەستهێناوە.
جارێکی دیکە ڕاهێنەرە سپێشەڵەکە گەڕاوەتەوە سەر ڕێچکەی دوورخستنەوە، لە وەرزی 2015/2016 لە چێڵسی دوورخرایەوە و بڕی 12.5 ملیۆنی بەدەستهێنا، لە وەرزی 2018/2019 دوای دوورخستنەوەی لە مانچستەر یونایتد دیسانەوە 15 ملیۆنی دیکەی کۆکردووەتەوە.
بە کۆکردنەوەی ئەو بڕانەی سەرەوە لەگەڵ ئەو بڕەی لە پای وازهێنان لە تۆتنهام بەدەستهێناوە، تاوەکو ئێستا لە ژیانی وەرزشییدا 77.5 ملیۆن پاوەندی دوای دوورخستنەوەکانی کۆکردووەتەوە.
