نێیمار دا سیلڤای ئەستێرەی بەرازیلی، بەردەوامبوونی لە یانەی پاریس سان جێرمان بۆ چەند وەرزێکی دیکە یەکلاییکردەوە.
بۆندی “نێی” لەگەڵ یانەی پاریس سان جێرمان تاوەکو هاوینی 2022 بەردەوامی دەبێت و تاوەکو ئێستا بەفەرمی گرێبەستی نوێی واژوونەکردووە، ئەوەش گومانیان لەسەر داهاتووی دروستکردووە و میدیاکانی هەرێمی کەتەلۆنیا نوسیویانە، ” هاوینی داهاتوو دەیەوێت بگەڕێتەوە بۆ بەرشلۆنە، لەبەرئەوەیە بۆندەکەی نوێناکاتەوە”.
تۆڕی ” ESPN“ی ئەمریکی بە پێچەوانەی بۆچوونەکانەوە ئاشکرایکردووە، کە نێیمار جارێکی دیکە ناگەڕێتەوە بۆ یانەی بەرشلۆنە و خولی ئیسپانیا، بەڵکو لە یانە فەرەنسیەکەی بۆ چوار وەرزی دیکەش بەردەوامدەبێت.
تۆڕە ناودارەکە لێدوانی لە ئەستێرەکەی سیلیساو وەرگرتووە و لەم بارەیەوە دەڵێت، ” نوێکردنەوەی بۆندەکەم لەگەڵ پاریس سان جێرمان؟ لە ئێستادا هیچ کێشەیەک نەماوە، وەک ئاشکرایە زۆر بەختەوەرم، لە ڕاستیدا ئێستا زۆر هەست بە ئارامی دەکەم و لەهەموو کاتێک زیاتر لەگەڵ یانەکەم هەست بە بەختەوەری دەکەم، پێوابێت بابەتەکە کۆتاییهاتووە”.
نێیمار لەم وەرزەدا 22 یاری بەدرێسی پاریسەوە ئەنجامداوە و 13 گۆڵی تۆمارکردووە و ڕەخسێنەری هەشت گۆڵی دیکە بووە.
