لەبارەی هاتوچۆی نێوان هەرێمی كوردستان و پارێزگاكانی دیكەی عێراق، لیژنەی باڵای ڕوبەڕوبوونەوەی كۆرۆنا چەند بڕیارێكی نوێی دەكرد.
لە ڕاگەیەندراوێكدا ئەمشەو 5ی نیسان، لیژنەی باڵای ڕوبەڕوبوونەوەی کۆرۆنا چەند بڕیارێكی نوێی لەبارەی هاتوچۆی نێوان هەرێمی كوردستان و پارێزگاكانی عێراق دەركرد.
لە بڕیارەكەدا باس لەوە كراوە، هاتوچۆی نێوان هەرێم و پارێزگاكانی عێراق تەنها چەند كەسێك دەگرێتەوە، لەوانە، “ئاژانس و ڕێكخراوەكانی UN و ڕێكخراوە نێودەوڵەتییەكان و هاوپەیمانان و دیپلۆماتكاران و شاندە فەرمییەكان”.
هەروەها “ئەو هاوڵاتییانەی نیشتەجێی هەرێمی كوردستانن، كەسانی نەخۆش كە پێویستیان بە چارەسەری نەخۆشی هەیە لە نەخۆشخانەكانی هەرێمی كوردستان و بازرگانان و وەبەرهێنەران”، ڕێگەپێدراون هاتوچۆ بكەن.
بەڵام پێویستە ئەو كەسانە تێستی كۆرۆنا ئەنجامبدەن.
لە خاڵێكی دیكەی بڕیارە نوێیەكاندا هاتووە، “كارى بازرگانى لەنێوان هەرێمی كوردستان و پارێزگاكانی عێراق بەردەوام دەبێت بە لەبەرچاوگرتنى تەواوى ڕێكارەكانى خۆپارێزى”.
