وەزارەتی دارایی هەرێم رایدەگەیەنێت، ماوەیەكە دراوی ساختە لە بازاڕەكانی هەرێمی كوردستاندا زیادیكردووە و وەزارەتی دارایی و ئابوریش داوا لە هاوڵاتییان دەكات زیاتر چاوكراوە بن لە كاتی مامەڵەكردن بە جۆرەكانی دراو تا تووشی زیان نەبن.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، لەو چوارچێوەیەشدا بەڕێوەبەرایەتیی بانكی ناوەندیی هەرێم لە سلێمانی خولی هۆشیاری بۆ خەزنەداری بانكەكان كردووەتەوە تا زیاتر چاوكراوە بن لەكاتی مامەڵەكردن بە دراوەكان.
ئاماژە بۆ ئەوەش كراوە، بڕیاریشە خولی هۆشیاری بۆ فەرمانگەكان و نووسینگە و كۆمپانیاكانی ئاڵوگۆڕی دراو بكرێتەوە تا هەمووان زیاتر بەئاگابن لە بڵاوبوونەوەی دراوی ساختە و مەترسییەكانی.
لەماوەی رابردوودا لەلایەن هێزە ئەمنییەكانەوە دەستبەسەر بڕێكی زۆر دراوی عێراقی ساختە لە جۆری 25 هەزاری و 50 هەزاری و دۆلاری ئەمریكی ساختە لەجۆری 50 دۆلاری و 100 دۆلاریدا گیراوە و ڕێكاری یاسایی پێویست لەو بارەیەوە ئەنجامدراوە.
