یاریزانی پێشووی هەڵبژاردەی نەرویج و یانەکانی ئارسیناڵ و یوڤانتۆس، نیکلاس بێندتنەر لە چاوپێکەوتنێکدا ئاماژە بە خراپی ڕەوتی ژیانی دەکات بەهۆی ئەو پارە زۆرەی لەبواری تۆپی پێدا بەدەستیهێناوە.
زەبەلاحە دانیمارکییەکە بەهۆی لادان لە ژیانی ئاسایی و سەرکێشییەکانیەوە ژیانێکی ئاڵۆزی تێپەڕاند و لە ئێستادا بەبێ یانە چاوەڕێی ئۆفەرێک دەکات، بڕیاربوو پەیوەندی بە خولی سوپەری چینەوە بکات، بەڵام تەشەنەکردنی ڤایرۆسی کۆرۆنا ئەو دەرگایەشی بەڕوویدا داخست.
بێندتنەری تەمەن 32 ساڵ لە چاوپێکەوتنێکدا بە یەکێک لە ڕۆژنامەنوسە دانیمارکییەکان دەڵێت، ” بەردەوام لە گازینۆکان بووم، شەوێکیان نەمدەتوانی لەسەر کورسییەکەم دابنیشم هێندە سەرخۆشبووم”.
هەروەها دەڵێت، ” تەمەنم تەنها 23 ساڵ بوو، لە گازینۆیەک زیاتر لە 400 هەزار پاوەندم بە قومارکردن لەماوەی 90 خولەکدا دۆڕاند، پارەم پێنەما، بەتەواوی مایەپوچبووم، دەچووم بۆ توالێتەکان و بەملاو ئەولادا دەکەوتم، ئاوم دەکرد بە دەموچاومدا، بەدوای بەرپرسی سندوقی یانەکەدا دەگەڕام و 30 هەزاری دیکەم قەرزکرد بۆ ئەوەی بەردەوامی بە یاریکردن بدەم”.
لە تەمەنی 30 ساڵییەوە یاریزانی ناوبراو بەهۆی سەرکێشی و دابەزینی ئاستییەوە لە پێکهاتەی دانیمارک دوورخرایەوە، لەم بارەیەوە دەڵێت، ” هەستم بە قێزەونی خۆم کرد، گریام، بەهۆی ئەو پارە زۆرەی لە ڕێگەی تۆپی پێوە بەدەستمهێنا ژیانم وێرانبوو، ئەگەر کات بگەڕێنرایەتەوە بۆ دواوە، بە چەکوش سەری خۆم پاندەکردەوە، تاوەکو تێدەگەیشتم چ چانسێک لە ژیاندا هاتووەتە بەردەمم، دەبوو خۆم تێبگەیەنم کە دەبێت بە گرنگییەوە لە ژیانی وەرزشیم بڕوانم”.
بێندتنەر تەمەنی 32 ساڵە و لە ژیانی وەرزشییدا یاری بۆ یانەکانی ئارسیناڵ، بێرمینگهام، ساندەرلاند، یوڤانتۆس، ڤۆلفسبۆرگ، نۆتنگهام فۆرێست، ڕۆزنبۆرگ، کۆپنهاگن، تامبی ئێف ئێف کردووە.
