ئوسامە نوجێفی، سەرۆكی بەرەی ڕزگاركردن و گەشەپێدان دەڵێت، “نیازی ئەمریكا بۆ كشاندنەوەی باڵیۆزخانەكەی لە عێراق مەترسیدارە و عێراق لەڕووی نێودەوڵەتییەوە پەراوێزدەخات.”
لە ڕاگەیاندراوێكدا كە ئەمڕۆ یەكشەممە 4ی تشرینی یەكەم بڵاویكردووەتەوە و وێنەیەكی دەست “تۆڕی میدیایی ئێستا” كەوتووە، بەرەی ڕزگاركردن و گەشەپێدان ڕایگەیاندووە، نوجێفی پێشوازی لە جینین هێنیس پلاسخارت، نوێنەری سكرتێری گشتیی نەتەوەیەكگرتووەكان لە عێراق كردووە.
بە گوێرەی ڕاگەیاندراوەكە، لە دیدارەكەدا دۆخی سیاسیی عێراق و هێرشكردنە سەر باڵیۆزخانەكان و هەڵبژاردن و بێسەروشوێنبووان گفتوگۆیان لەبارەوە كراوە.
نوجێفی بە نوێنەرەكەی سكرتێری گشتیی نەتەوەیەكگرتووەكانی گوتووە، “ئەو پەرەسەندنانەی دوای هێرشكردنە سەر باڵیۆزخانەكان و كاروانە سەربازییەكان هاتوونەتە ئاراوە، دەرئەنجامەكانی ئەو ڕووداوانەش لەوانە نیازی ئەمریكا بۆ كشاندنەوەی باڵیۆزخانەكەی لە عێراق، پەرەسەندنێكی مەترسیدارە و عێراق دەخاتە بەردەم مەترسیی گۆشەگیریی نێودەوڵەتی و دەبێتە كۆژانێكی نوێ بۆ گەلی عێراق.”
ئوسامە نوجێفی، سەرۆكی بەرەی ڕزگاركردن و گەشەپێدان بە پێویستی زانیوە “عێراق لە ململانێ هەرێمی و نێودەوڵەتییەكان دووربخرێتەوە.”
لە ماوەی ڕابردوودا جگە لە موشەكبارانكردنی دوو شوێن لە هەولێر، باڵیۆزخانەی ئەمریكا لە بەغداد و چەند كاراونێكی سەربازیی هاوپەیمانان لە بەغداد و بابل و باشووری عێراق كرانە ئامانج، ئەوەش كاردانەوەی لێكەوتەوە و ئەمریكا هەڕەشەی داخستنی باڵیۆزخانەكەی لە بەغداد كرد.
